Barnfri - Ei bok om å ikkje bli mor

Forfattar: Brit Aksnes

Gitt ut: 2026
Hefta
176 sider
20 x 12,5 cm
ISBN 9788251304337

Kjem 30. oktober. Kan tingast allereie no!

Du har kome godt opp i 30-åra. Vener lurar, familie lurar, kollegaer lurar: Skal du ikkje snart få deg ungar du då? Eit vondt spørsmål om du gjerne vil ha barn. Men kva om ungar faktisk ikkje står på ynskjelista? Går det an å bli lykkeleg utan? Eller er det å sei nei til meininga med livet?  

Dette var introen på radioprogrammet «Biologisk klokke utan batteri» som Brit Aksnes laga for NRK Ekko i 2017. No er Aksnes godt opp i 40-åra, framleis utan born - og kan fortelja om korleis det vart med meininga med livet og lykka. Berre at no melder det seg nye spørsmål: kven skal ta seg av deg når du blir gamal og er du ikkje redd for å angra?

Frivillig eller ikkje, over tjue prosent av alle over 45 år er statistisk sett barnlause. Aksnes føler seg ikkje barnlaus, ho manglar ikkje ungar. Valte ho det vekk? Mest ja. Men kva om det berre blei sånn? Treng du bli rekna som barnlaus viss du kjenner deg barnfri? 

Barnfri – ei bok om å ikkje bli mor byr på forsking, tal, funderingar, intervju med dei som har peiling, sitat frå Kvinneguiden og utlevering av forfattaren sine erfaringar. Kvifor får me færre barn? Finst morsinstinkt? Er folk lykkelegare med eller utan ungar? Er forfattaren eigentleg ein barnehatar?!

--
Brit Aksnes (f. 1977) jobbar som journalist, skribent og kulturfrilansar etter mange år i forlagsbransjen. I tillegg til å melda film fast i Dag og Tid, har ho levert jamnleg gjestekommentarar i Bergens Tidende og program for Ekko på NRK P2. I 2018 debuterte ho som forfattar med boka Mannemenneske – Menn om livet, sex og forhold (Pelikanen forlag). Barnfri – ei bok om å ikkje bli mor er hennar andre bok. Aksnes spelar også i Microbandet, som i samband med førre boka gjekk sin sigersgang på litteraturfestivalar.